యుజ్వేంద్ర చాహల్ – ధనశ్రీ వర్మ అధికారికంగా విడిపోయారు…!!

యుజ్వేంద్ర చాహల్ – ధనశ్రీ వర్మ అధికారికంగా విడిపోయారు

భారత క్రికెటర్ యుజ్వేంద్ర చాహల్ మరియు అతని భార్య ధనశ్రీ వర్మ అధికారికంగా విడిపోయారు. గురువారం (ఫిబ్రవరి 21) ముంబై బాంద్రాలోని ఫ్యామిలీ కోర్టులో హాజరైన ఈ జంట, విడాకుల ప్రక్రియను పూర్తి చేసుకున్నారు.

కోర్టు జడ్జి మొదట 45 నిమిషాల పాటు కౌన్సెలింగ్ ఇచ్చి, విడిపోవడానికి గల కారణాలను తెలుసుకున్నారు. ఆపై, “ఇప్పటికీ మీరు విడిపోవాలని అనుకుంటున్నారా?” అని అడిగినప్పుడు, చాహల్, ధనశ్రీ ఇద్దరూ పరస్పర అంగీకారంతో విడిపోవాలని తేల్చుకున్నారు. దీంతో కోర్టు విడాకులకు ఆమోదం తెలిపింది.

ధనశ్రీ క్రిప్టిక్ పోస్ట్

విడాకుల అనంతరం ధనశ్రీ వర్మ సోషల్ మీడియాలో ఓ క్రిప్టిక్ పోస్ట్ షేర్ చేసింది.

“మనం పడే బాధలు, ఎదుర్కొనే పరీక్షలను కొంతకాలం తర్వాత భగవంతుడు ఆశీర్వాదాలుగా మార్చగలడని తెలిసింది. మీరు ఏదైనా విషయంలో ఒత్తిడి, ఆందోళనకు గురైతే.. భగవంతుడిపై నమ్మకం పెట్టుకోండి. మీరు పొందే మరో అవకాశాన్ని మర్చిపోకండి.”

ఈ పోస్ట్‌కు “ఫ్రం స్ట్రెస్డ్ టు బ్లెస్డ్” (ఒత్తిడి నుంచి ఆశీర్వాదం) అనే క్యాప్షన్‌ను జత చేసింది.

18 నెలలుగా విడివిడిగా

కోర్టు జడ్జి ప్రకారం, చాహల్ మరియు ధనశ్రీ గత 18 నెలలుగా విడివిడిగా ఉన్నారు. కొన్ని నెలల క్రితం, ఇన్‌స్టాగ్రామ్‌లో ఒకరినొకరు అన్‌ఫాలో చేసుకోవడం, క్రికెటర్ తన భార్యతో ఉన్న అన్ని ఫోటోలను తొలగించడం, ధనశ్రీ తన ఇన్‌స్టాగ్రామ్ పేరు నుంచి ‘చాహల్’ అనే పదాన్ని తొలగించడం వంటి చర్యలు విడాకుల ప్రచారానికి బలం చేకూర్చాయి.

తాజాగా యుజ్వేంద్ర చాహల్ తన సోషల్ మీడియాలో “కొత్త జీవితం లోడింగ్” అని పోస్ట్ చేయడం, వారి విడిపోవడాన్ని ఇంకా స్పష్టంగా వెల్లడించింది.