హైదరాబాద్, ఏప్రిల్ 16:
తెలంగాణ రాష్ట్ర రోడ్డు రవాణా సంస్థ (ఆర్టీసీ)లో త్వరలోనే 3,038 ఖాళీ పోస్టుల భర్తీ జరగనుందని ఆ సంస్థ వైస్ చైర్మన్ మరియు మేనేజింగ్ డైరెక్టర్ సజ్జనార్ వెల్లడించారు. ఈ నియామకాల కోసం ప్రభుత్వ అనుమతి ఇప్పటికే లభించినట్టు తెలిపారు. ఉద్యోగ నియామకాల ద్వారా ప్రస్తుత సిబ్బందిపై ఉన్న పనిభారం గణనీయంగా తగ్గనుందని ఆయన పేర్కొన్నారు.
అంబేడ్కర్ జయంతి సందర్భంగా ఏప్రిల్ 14న హైదరాబాద్ బాగ్‌లింగంపల్లిలోని ఆర్టీసీ కళాభవన్‌లో నిర్వహించిన కార్యక్రమంలో ముఖ్యఅతిథిగా పాల్గొన్న సజ్జనార్, డా. బి.ఆర్. అంబేడ్కర్ చిత్రపటానికి నివాళులర్పించారు. అనంతరం మాట్లాడుతూ, కొత్తగా భర్తీ చేయనున్న ఉద్యోగాల్లో ఎస్సీ వర్గీకరణ అమలు చేస్తామని స్పష్టం చేశారు. ఉద్యోగుల సంక్షేమం కోసం సంస్థ యాజమాన్యం కట్టుబడి పనిచేస్తోందని తెలిపారు.
ఇక తెలంగాణ లాసెట్ 2025 దరఖాస్తుల గడువు పొడిగించినట్టు కన్వీనర్ బీ విజయలక్ష్మీ ప్రకటించారు. గతంలో ఏప్రిల్ 15 వరకు మాత్రమే గడువు ఉండగా, తాజా నిర్ణయం మేరకు ఏప్రిల్ 30వ తేదీ వరకు ఎలాంటి ఆలస్య రుసుం లేకుండా దరఖాస్తు చేసుకునే అవకాశం ఉంది.
ఈవిధంగా, మూడు సంవత్సరాల లాసెట్‌కు ఇప్పటివరకు 21,483 మంది, ఐదు సంవత్సరాల కోర్సుకు 6,326 మంది, పీజీ లాసెట్‌కు 2,556 మంది దరఖాస్తు చేసుకున్నారు. లాసెట్ ప్రవేశ పరీక్షను జూన్ 6వ తేదీన నిర్వహించనున్నట్టు వెల్లడించారు.
By
