ఆంధ్రప్రదేశ్ ప్రభుత్వం స్వర్ణాంధ్ర విజన్ 2047పై పూర్తి స్థాయిలో దృష్టి పెట్టింది. అమరావతి పునర్నిర్మాణ పనుల్లో భాగంగా సీఆర్డీఏ వేగంగా ముందుకు సాగుతోంది. మొత్తం 24 గ్రామాల అభివృద్ధికి ప్రణాళికలు రూపొందించి, ప్రభుత్వ పథకాల అమలు, గ్రాస్ లెవెల్లో అభివృద్ధి చర్యలు చేపట్టనున్నారు.
ఏపీ ముఖ్యమంత్రి చంద్రబాబు కలెక్టర్లతో రెండు రోజుల పాటు సమీక్ష సమావేశం నిర్వహించనున్నారు. ఈ సమావేశాన్ని గత సమావేశాలకు భిన్నంగా ప్లాన్ చేశారు. తొలిసారిగా జిల్లా కలెక్టర్లను జిల్లాల వారీగా అభివృద్ధి ప్రణాళికలు, సమస్యలు, పరిష్కారాలు సీఎం దృష్టికి తీసుకురావడానికి అవకాశం కల్పించారు.
కలెక్టర్ల సమావేశంలో ముఖ్యాంశాలు
- ఏపీ సచివాలయం ఐదో బ్లాక్లో ఈ సమావేశం జరుగుతుంది.
- ప్రతి మూడు నెలలకు ఒకసారి కలెక్టర్ల సమావేశాలు నిర్వహించాలని ప్రభుత్వం నిర్ణయించింది.
- మూడవ సమావేశంలో 26 జిల్లాల కార్యాచరణ ప్రణాళికలను ప్రజెంట్ చేయనున్నారు.
- తొలి రోజు 9 జిల్లాల కలెక్టర్లు, రెండవ రోజు 17 జిల్లాల కలెక్టర్లు తమ ప్రణాళికలను వివరించనున్నారు.
- ప్రతి కలెక్టర్కు 20 నిమిషాల సమయం ఉండగా, 10 నిమిషాలు ప్రజెంటేషన్, మిగతా 10 నిమిషాలు సమస్యలు, పరిష్కారాలపై చర్చ జరగనుంది.
- డిప్యూటీ సీఎం పవన్కల్యాణ్ కూడా ఈ సమావేశంలో పాల్గొననున్నారు.
భూ అక్రమాలపై చర్చ, ల్యాండ్ సర్వే నివేదిక
- తొలి రోజు CCLA ల్యాండ్ సర్వేపై ప్రజెంటేషన్ ఉంటుంది.
- భూ అక్రమాలపై జిల్లా ఇంచార్జ్ మంత్రుల నుండి అందిన నివేదికలను సమీక్షించనున్నారు.
- అటవీ, పర్యావరణ శాఖ ప్రత్యేక ప్రధాన కార్యదర్శి నగర వనాలు, పచ్చదనం, ఎకో టూరిజం వంటి అంశాలపై ప్రజెంటేషన్ ఇవ్వనున్నారు.
- సంక్షేమ పథకాల అమలుపై సంబంధిత శాఖల కార్యదర్శులు వివరించనున్నారు.
P4 పాలసీ – పేదరిక నిర్మూలన లక్ష్యం
- ఉగాది నుంచి పబ్లిక్, ప్రైవేట్, పీపుల్ పార్టనర్షిప్ (P4) పాలసీని అమలు చేయనున్నట్లు సీఎం చంద్రబాబు తెలిపారు.
- మొదటి దశలో 20 లక్షల కుటుంబాలకు ప్రయోజనం కల్పించనున్నారు.
- 2029 నాటికి పేదరిక నిర్మూలన లక్ష్యంగా పెట్టుకుని, ఎన్నారైలు సహా ఎవరైనా ఇందులో భాగస్వాములు కావచ్చని సీఎం పిలుపునిచ్చారు.
- ప్రణాళిక శాఖ ముఖ్య కార్యదర్శి ఈ కార్యక్రమంపై వివరించనున్నారు.
వేసవి సమస్యలు & సురక్షితతపై దృష్టి
- తాగునీటి సమస్య, పశుగ్రాసం, పశువులకు తాగునీటి లభ్యతపై ప్రణాళికలు రూపొందించనున్నారు.
- సీజనల్ వ్యాధుల నివారణ చర్యలు, ఉపాధి హామీ పథకం పనుల అమలు.
- PM సూర్య ఘర్ పథకం కింద ప్రతి నియోజకవర్గంలో 10,000 రూఫ్టాప్ సోలార్ ప్యానెల్స్ స్థాపనపై చర్చ.
- రెండవ రోజు సాయంత్రం 5 గంటల తరువాత శాంతి భద్రతలపై సమీక్ష సమావేశం జరగనుంది.
స్వర్ణాంధ్ర విజన్ 2047 దిశగా ప్రభుత్వం చేపడుతున్న ఈ సమీక్షలు, ప్రణాళికలు రాష్ట్రాభివృద్ధికి దోహదం చేయనున్నాయి.
By
