ఆంధ్రప్రదేశ్‌లోని విశాఖపట్నం జిల్లా సింహాచలం శ్రీ వరాహ లక్ష్మీ నరసింహ స్వామి ఆలయంలో జరిగిన చందనోత్సవం వేళ ఘోర ప్రమాదం జరిగింది. ఈ ఉత్సవంలో పాల్గొన్న భక్తులపై గోడ కూలిపోవడంతో ఏడుగురు భక్తులు మృతి చెందారు. మృతుల్లో ముగ్గురు మహిళలు ఉన్నారు. ఇంకా పది మందికి తీవ్ర గాయాలు అయ్యాయి. శిథిలాల కింద మరికొందరు చిక్కుకున్నట్లు సమాచారం.
ఈ ఘటనపై తెలంగాణ ముఖ్యమంత్రి రేవంత్ రెడ్డి తీవ్ర దిగ్భ్రాంతి వ్యక్తం చేశారు. చందనోత్సవం సందర్భంగా భక్తులు మరణించిన ఘటన తీవ్ర ఆవేదనను కలిగించిందని, మృతుల కుటుంబాలకు తన ప్రగాఢ సానుభూతిని తెలియజేశారు. మృతుల ఆత్మలకు శాంతి చేకూరాలని భగవంతుడిని ప్రార్థిస్తున్నానని తెలిపారు.
ప్రమాదం జరిగిన వెంటనే రెస్క్యూ, ఎన్డీఆర్ఎఫ్, ఎస్డీఆర్ఎఫ్ బృందాలు సంఘటన స్థలానికి చేరుకుని సహాయక చర్యలు చేపట్టాయి. ఆంధ్రప్రదేశ్ హోంమంత్రి అనిత, జిల్లా కలెక్టర్ సంఘటన స్థలానికి చేరుకుని పరిస్థితిని సమీక్షిస్తున్నారు. మృతదేహాలను కేజీహెచ్ ఆస్పత్రికి తరలించారు.
ఈ ఘటన ఆలయ నిర్వహణలో లోపాలను, భద్రతా చర్యలపై ప్రశ్నలను వెలికి తీస్తోంది. భక్తుల భద్రతను నిర్ధారించడానికి సంబంధిత అధికారులు తగిన చర్యలు తీసుకోవాల్సిన అవసరం ఉంది.
By
