“‘తండేల్’ మూవీ ట్రైలర్: నాగ చైతన్య ఎమోషనల్ టర్న్‌తో ప్రేమకథలో నడిపిస్తున్నారు”
అక్కినేని యంగ్ హీరో నాగ చైతన్య విభిన్నమైన కథలను ఎంచుకుంటూ ముందుకెళ్తున్నారు. కెరీర్ ప్రారంభంలో లవర్ బాయ్‌గా ప్రేక్షకులను మెప్పించిన చైతన్య, ఇప్పుడు మాస్ పాత్రలతో అలరిస్తున్నారు. తన నటనతో వేరే స్థాయికి చేరుకున్న ఈ అక్కినేని అందగాడు, తన కెరీర్‌లో ఎన్నో విజయాలు సాధించాడు.
ప్రస్తుతం నాగ చైతన్య హీరోగా నటిస్తున్న తాజా చిత్రం తండేల్. ఈ సినిమాపై భారీ అంచనాలు ఉన్నాయి. ప్రీ రిలీజ్‌ బిజినెస్ చాలా బాగా జరుగుతుందనే మాట వినిపిస్తోంది. సాయి పల్లవి హీరోయిన్‌గా నటిస్తుండగా, కార్తికేయ 2 ఫేమ్ డైరెక్టర్ చందూ మొండేటి ఈ చిత్రానికి దర్శకత్వం వహిస్తున్నారు. గీతా ఆర్ట్స్ బ్యానర్‌పై బన్నీ వాసు నిర్మాణ బాధ్యతలు చేపట్టారు. ఫిబ్రవరి 7న ఈ చిత్రం ప్రేక్షకుల ముందుకు రానుంది.
తాజాగా తండేల్ మూవీ ట్రైలర్‌ను వైజాగ్‌లో విడుదల చేశారు. ఈ ట్రైలర్ అందర్నీ ఆకట్టుకుంటోంది. నాగ చైతన్య తన గత హిట్ సినిమాలైన ఏ మాయ చేశావే, లవ్ స్టోరీ లాంటి చిత్రాల్లో తన నటనతో ప్రేక్షకులను మెప్పించినట్లు, ఈ చిత్రంలో కూడా అలరిస్తారని కనిపిస్తోంది. ట్రైలర్ ప్రకారం, ఈ చిత్రం ఒక అందమైన ప్రేమకథగా రూపొందినట్లు తెలుస్తోంది.
ట్రైలర్ లాంచ్ ఈవెంట్‌లో చైతన్య మాట్లాడుతూ, “తండేల్ ప్రతి ఒక్కరికి నచ్చే విధంగా ఉంటుంది. ఈ సినిమాకి చాలా కష్టపడ్డాను. నా పాత్ర ప్రతిఒక్కరికి కనెక్ట్ అవుతుంది” అని అన్నారు. మరో సరదా విషయంగా, “వైజాగ్ అమ్మాయి శోభితను ప్రేమించి పెళ్లి చేసుకున్నాను. వైజాగ్‌లో ఈ సినిమాకు మంచి వసూళ్లు రావాలి. లేకపోతే నా ఇంట్లో నా పరువు పోతుంది” అని చైతన్య చెప్పిన మాటలు సోషల్ మీడియాలో వైరల్‌గా మారాయి.
ఈ చిత్రంలో చైతన్య మొదటిసారి మత్యకారుడి పాత్రలో కనిపించనున్నారు. నిజజీవిత సంఘటనల ఆధారంగా ఈ కథను తెరకెక్కించినట్లు దర్శకుడు చందూ మొండేటి వెల్లడించారు. దేవీ శ్రీ ప్రసాద్ సంగీతం అందించిన ఈ చిత్రం ప్రేక్షకుల ముందుకు రానుంది.
By
