అంతరిక్ష వార్తలు ఎప్పుడూ ఆసక్తికరంగానే ఉంటాయి. ఇటీవల వ్యోమగాములు సునీతా విలియమ్స్‌, బుల్‌ విల్మోర్‌ ఐఎస్ఎస్లో చిక్కుకున్న విషయం ప్రపంచవ్యాప్తంగా చర్చనీయాంశంగా మారింది. వారం రోజుల మిషన్‌ కోసం వెళ్లిన వారు మొత్తం తొమ్మిది నెలలు అక్కడే ఉండిపోయారు. చివరకు భూమికి తిరిగి చేరుకోవడంతో అందరూ ఊపిరిపీల్చుకున్నారు. ఈ సందర్భంలో, వ్యోమగాములు అంతరిక్షంలో ఎలా జీవిస్తారు? ఏం తింటారు? ఎలా నిద్రపోతారు? వంటి ప్రశ్నలు చర్చనీయాంశంగా మారాయి.
ఈ క్రమంలో, జపాన్‌కు చెందిన వ్యోమగామి కోయిచి వకాటా అంతర్జాతీయ అంతరిక్ష కేంద్రంలో బేస్‌బాల్‌ ఆడిన వీడియో ఇప్పుడు ఇంటర్నెట్‌లో వైరల్‌గా మారింది. ప్రపంచ వ్యాప్తంగా సంచలనం రేపిన ఈ వీడియోను స్పేస్‌ఎక్స్‌ అధినేత ఎలాన్‌ మస్క్‌ కూడా ఎక్స్‌ (Twitter) లో షేర్‌ చేశారు.
కోయిచి వకాటా జీరో గ్రావిటీని వినియోగించుకుని ఐఎస్ఎస్లో ఒంటరిగా బేస్‌బాల్‌ ఆడారు. తానే బాల్‌ విసిరి, తానే బ్యాట్‌తో కొట్టిన దృశ్యాలు సోషల్‌ మీడియాలో విపరీతంగా పాపులర్‌ అయ్యాయి. ఈ వీడియోను షేర్‌ చేస్తూ కోయిచి, “ఇది బేస్‌బాల్‌ సీజన్‌. మేజర్‌ లీగ్‌ బేస్‌బాల్‌ సీజన్‌ జపాన్‌లో ప్రారంభమవుతోంది. ఎక్స్‌పెడిషన్‌ 68 సమయంలో ఐఎస్ఎస్లో బేస్‌బాల్‌ ఆడాను. జీరో గ్రావిటీలో ఈ ఆట ఆడేందుకు జట్టుతో పని లేదు” అని కామెంట్‌ చేశారు.
దాదాపు 20 ఏళ్ల పాటు వ్యోమగామిగా పనిచేసిన కోయిచి వకాటా, 2024లో జపాన్‌ ఏరోస్పేస్‌ ఎక్స్‌ప్లోరేషన్‌ ఏజెన్సీ (JAXA) నుంచి రిటైర్‌ అయ్యారు. ఐదుసార్లు ఐఎస్ఎస్‌కు వెళ్లిన ఆయన మొత్తం 500 రోజులు అంతరిక్షంలో గడిపారు. అంతేకాదు, ఎక్స్‌పెడిషన్‌ 39 సమయంలో ఐఎస్‌ఎస్‌ కమాండర్‌గా పనిచేసిన తొలి జపనీస్‌ వ్యోమగామిగా రికార్డు సాధించారు. ఇప్పుడు ఆయన అంతరిక్షంలో బేస్‌బాల్‌ ఆడిన వీడియో నెట్టింట ట్రెండింగ్‌గా మారింది.
By
