న్యూఢిల్లీ: జెరోధా సహ వ్యవస్థాపకుడు నిఖిల్ కామత్ పాడ్‌కాస్ట్ షోలో ప్రధానమంత్రి నరేంద్ర మోదీ ప‌లు విష‌యాల‌పై ఓపెన్‌గా మాట్లాడారు. పాడ్‌కాస్ట్ ప్రారంభంలో నిఖిల్ కామత్ ప్రధాని మోదీతో “నేను మీ ముందు కూర్చుని మాట్లాడుతున్నాను.. నాకు భయంగా ఉంది. ఇది నాకు కష్టమైన సంభాషణ” అని అన్నారు. దీనికి ప్రధాని మోదీ నవ్వుతూ, “ఇది నా మొదటి పాడ్‌కాస్ట్, మీ ప్రేక్షకులు దీన్ని ఎలా ఇష్టపడతారో నాకు తెలియదు” అని బదులిచ్చారు. చెడు ఉద్దేశ్యంతో ఎప్పుడూ ఎటువంటి తప్పు చేయకూడదనేది తన జీవిత మంత్రమని ప్రధానమంత్రి అన్నారు.
నేను ముఖ్యమంత్రి అయినప్పుడు ఒక ప్రసంగంలో.. కష్టపడి పనిచేయడానికి వెనుకాడను. నాకోసం నేను ఏమీ చేసుకోను అని చెప్పానని ప్రధానమంత్రి అన్నారు. నేను తప్పులు చేసే మానవుడిని, కానీ చెడు ఉద్దేశ్యంతో నేను ఎప్పుడూ ఏ తప్పు చేయను. ఇదే నా జీవిత మంత్రం. అన్నింటికంటే, ముందుగా నేను మనిషిని, దేవుడిని కాదని అన్నారు.
నిఖిల్ కామత్ నిర్వహించిన పాడ్‌కాస్ట్‌లో ప్రధాని మోదీ మాట్లాడుతూ, గాంధీ, సావర్కర్ మార్గాలు వేర్వేరుగా ఉన్నాయని, కానీ వారి భావజాలం “స్వేచ్ఛ” అని అన్నారు. భావజాలం కంటే ఆదర్శవాదం ముఖ్యం. భావజాలం లేకుండా రాజకీయాలు ఉండవు. అయితే, ఆదర్శవాదం చాలా ముఖ్యం. స్వాతంత్య్రానికి ముందు భావజాలం స్వేచ్ఛ. గాంధీ మార్గం భిన్నంగా ఉంది. కానీ అతని భావజాలం స్వేచ్ఛ. సావర్కర్ తన మార్గాన్ని ఎంచుకున్నాడు, అతని సిద్ధాంతం కూడా స్వేచ్ఛ. ప్రధానమంత్రి ఎల్లప్పుడూ దేశానికి మొదటి స్థానం ఇవ్వాలని ప్రధాని మోదీ అన్నారు.
నేను నా సౌకర్యాన్ని బట్టి నా వైఖరిని మార్చుకునే వ్యక్తిని కాదు. నేను ఒకే ఒక భావజాలాన్ని నమ్ముకుని పెరిగాను. నా భావజాలాన్ని కొన్ని మాటల్లో వివరించాల్సి వస్తే, నేను ‘దేశం ముందు’ అని చెబుతాను. ‘నేషన్ ఫస్ట్’ అనే ట్యాగ్‌లైన్‌కు సరిపోయేది ఏది అయినా నన్ను సంప్రదాయాల సంకెళ్లలో బంధించదు. ఇది ముందుకు సాగడానికి మాకు ప్రేరణనిచ్చింది. నేను పాత విషయాలను వదిలి కొత్త విషయాలను స్వీకరించడానికి సిద్ధంగా ఉన్నాను. అయితే, దీని షరతు ఎల్లప్పుడూ ‘దేశం ముందు’ అనేదే ఉంటుంది.
నేను ఒక సాధారణ విద్యార్థిని అని ప్రధానమంత్రి అన్నారు. నాకు ఒక టీచర్ ఉండేవారు, ఆయన నా పట్ల చాలా ప్రేమగా ఉండేవారు. నేను 32 మంది ఉపాధ్యాయులను సత్కరించాను. అవి నా జీవితంలోని మంచి క్షణాలు. ప్రధాని తన స్నేహితుల గురించి మాట్లాడుతూ, నేను చిన్న వయసులోనే ఇల్లు వదిలి వెళ్లిపోయానని ప్రధాని మోదీ అన్నారు. నేను ఇంటిని మాత్రమే కాదు, అన్నీ వదిలి వెళ్ళాను. ఎవరితోనూ సంబంధం లేదు. కానీ నేను ముఖ్యమంత్రి అయినప్పుడు, నాస్నేహితులను ఒక సభకు పిలవాలనే కోరిక నా మనసులో కలిగింది. నేను అందరికీ ఫోన్ చేసాను. ఆ రాత్రి చాలా కబుర్లు చెప్పుకున్నాం. మేము ఇంకా టచ్‌లోనే ఉన్నామ‌ని అన్నారు.
రాజకీయాల్లోకి వచ్చే యువతకు నిబద్ధత ఉండాలి. ప్రజల సుఖదుఃఖాలలో భాగస్వాములు ఉండాలి. మంచి టీమ్ ప్లేయర్ అయి ఉండాలి. ప్రసంగం ఇవ్వడం కంటే సంభాషించడం చాలా ముఖ్యం. దేశానికి రాజకీయాల్లోకి వచ్చే ఇలాంటి లక్ష మంది యువత అవసరమ‌న్నారు.
By
