గంటకు వందల కోట్ల లావాదేవీలు… రోజుకు అనేకమంది ఆత్మహత్యలు… పట్నాల నుంచి పల్లె దాకా విస్తరించిన బెట్టింగ్ మాఫియా! కోట్లాది మంది తమ సంపాదనలో సగానికి పైగా బెట్టింగ్‌కే వినియోగిస్తున్నారు. అయితే, ఈ బెట్టింగ్ యాప్‌లను అరికట్టాలంటే ఎలా? యాప్‌లను ఎలా నిలిపివేయాలి? నిర్వాహకులను ట్రాక్ చేయడం ఎంత సాధ్యం?
ఇప్పటికే పోలీసులు బెట్టింగ్ యాప్‌ల ప్రమోటర్లపై కేసులు నమోదు చేసి, కొంతమందిని విచారణకు పిలిచి, అరెస్టులు చేస్తున్నారు. పరారీలో ఉన్నవారి కోసం వేట కొనసాగుతోంది. కానీ అసలు బెట్టింగ్ వ్యవస్థనే మూసేయడం సాధ్యమేనా? నిర్వహకులను పూర్తిగా కట్టడి చేయగలరా? ఇదే ఇప్పుడు పోలీసుల ముందున్న అతిపెద్ద సవాల్!
ఆన్‌లైన్ బెట్టింగ్: ప్రపంచవ్యాప్తంగా విస్తరించిన మాఫియా
ఆన్‌లైన్ బెట్టింగ్ కంపెనీలు మొదట డొమైన్ కొనుగోలు చేసి, భారీ పెట్టుబడులతో వెబ్‌సైట్‌లు, యాప్‌లు అభివృద్ధి చేస్తాయి. జైపూర్, ఢిల్లీ, నొయిడా వంటి నగరాలతో పాటు విదేశాల్లోని ప్రముఖ డెవలపర్లను కాంట్రాక్ట్‌కు తీసుకుని, గేమ్ డిజైనింగ్ నుంచి పేమెంట్ గేట్‌వే ఏర్పాట్ల దాకా అన్నీ అత్యాధునికంగా ప్లాన్ చేస్తారు.
తర్వాత ఈ యాప్‌లను ప్రజల్లోకి తీసుకెళ్లేందుకు సోషల్ మీడియా ఇన్‌ఫ్లూయెన్సర్లను ఉపయోగించి భారీగా ప్రచారం చేస్తారు. వారికి ఎక్కువ పారితోషికాలు చెల్లించి యాప్‌లను ప్రమోట్ చేయిస్తారు. అలాగే, 24 గంటల కాల్‌సెంటర్లు నిర్వహించి, యూజర్లతో ఎప్పుడూ టచ్‌లో ఉంటారు.
చైనా నుంచి మద్దతు, విదేశాల నుంచి ఆపరేషన్
ఇప్పటికే చాలా దేశాల్లో బెట్టింగ్ యాప్‌లపై నిషేధం విధించినా, కొన్ని దేశాలు మాత్రం వీటి స్వర్గధామంగా మారాయి. చైనా నేరుగా బెట్టింగ్ యాప్‌లను నిర్వహించకపోయినా, ఆర్థిక మద్దతు, టెక్నాలజీ సపోర్ట్, డిజిటల్ మార్కెటింగ్ ద్వారా భారతదేశంలో ఈ జూద వ్యాపారంలో కీలక పాత్ర పోషిస్తోంది.
సైరస్, మాల్టా వంటి దేశాలు గ్యాంబ్లింగ్ కంపెనీలకు అనుకూలమైన పన్ను విధానాలు కల్పిస్తున్నాయి. అందువల్ల అధిక శాతం బెట్టింగ్ యాప్‌లు విదేశాల నుంచే ఆపరేట్ అవుతున్నట్లు రిపోర్టులు చెబుతున్నాయి.
పోలీసులకు పెద్ద పరీక్ష: ఐపీఎల్ బెట్టింగ్!
ప్రస్తుతం ఐపీఎల్ సీజన్ నేపథ్యంలో, పోలీసులు భారీ నిఘా ఏర్పాటు చేస్తున్నారు. ఐపీఎల్ సందర్భంగా కోట్ల రూపాయల బెట్టింగ్ జరిగే అవకాశం ఉంది. ప్రతి బాల్‌కీ, ఓవర్‌కీ బెట్టింగ్‌లు జరుగుతాయి.
దీంతో బెట్టింగ్ మాఫియాను నియంత్రించేందుకు పోలీసులు ప్రత్యేక బృందాలను రంగంలోకి దించారు. టెక్కీల సహాయంతో యాప్‌ల మోసాలను కనిపెట్టే పనిలో ఉన్నారు. బెట్టింగ్ నిర్వహకులపై చట్టపరమైన చర్యలు తీసుకునేందుకు సిద్ధమయ్యారు.
ఈ నేపథ్యంలో, భవిష్యత్తులో బెట్టింగ్ యాప్ మాఫియాను పూర్తిగా అణచి వేయగలరా? దేశంలో ఈ మాఫియాకు ఫుల్‌స్టాప్ పెట్టగలరా? అనేది చూడాలి!
By
