తెలంగాణ ముఖ్యమంత్రి రేవంత్ రెడ్డి ఢిల్లీలో బీసీ రిజర్వేషన్ల పెంపు కోసం జంతర్ మంతర్ వద్ద భారీ ధర్నా నిర్వహించారు. “ఇక మేం ఢిల్లీకి రాబోం, మోదీయే మా గల్లీకి రావాలి” అంటూ కేంద్రంపై విమర్శలు గుప్పించారు. తెలంగాణ ప్రభుత్వం బీసీ రిజర్వేషన్లను 42% కు పెంచుతూ అసెంబ్లీలో బిల్లు ఆమోదించినప్పటికీ, కేంద్ర ప్రభుత్వం దానికి గ్రీన్ సిగ్నల్ ఇవ్వడం లేదని ఆగ్రహం వ్యక్తం చేశారు. కులగణన చేపట్టాలి, బీసీ మహిళలకు 33% రిజర్వేషన్లు కేటాయించాలి అనే డిమాండ్లను కూడా రేవంత్ రెడ్డి ఉద్ఘాటించారు.
ఈ మహా ధర్నాకు కాంగ్రెస్, ఎంఐఎం, డీఎంకే, ఎన్సీపీ సహా పలు రాజకీయ పార్టీల నేతలు సంఘీభావం తెలిపారు. కనిమొళి, అసదుద్దీన్ ఓవైసీ, సుప్రియా సూలే వంటి ప్రముఖ నేతలు ధర్నాలో పాల్గొన్నారు. సినీ నటులు సుమన్, విజయశాంతి రేవంత్ రెడ్డిని “బీసీలకు నిజమైన నాయకుడు” అంటూ ప్రశంసించారు.
“తెలంగాణ ఉద్యమం తరహాలోనే బీసీ రిజర్వేషన్ కోసం పోరాడాలి” అంటూ కాంగ్రెస్ సీనియర్ నేత వీహెచ్, కోదండరాం వ్యాఖ్యానించారు. “మేం గుజరాత్‌లో భూమి అడగడం లేదు. మా న్యాయమైన హక్కును కోరుతున్నాం” అంటూ రేవంత్ స్పష్టం చేశారు. కేంద్ర ప్రభుత్వం తక్షణమే బీసీ రిజర్వేషన్ల పెంపు బిల్లును పార్లమెంట్‌లో ఆమోదించాలని డిమాండ్ చేశారు.
ఈ మహా ధర్నా అనంతరం సీఎం రేవంత్ రెడ్డి నేతృత్వంలోని తెలంగాణ మంత్రుల బృందం కేంద్ర మంత్రులతో భేటీ కానుంది. బీసీ రిజర్వేషన్ల పెంపుకు మద్దతు ఇవ్వాలని, రాష్ట్రాలకు పూర్తి అధికారాన్ని ఇవ్వాలని కేంద్రాన్ని కోరనున్నారు.
By
