ఆంధ్రప్రదేశ్ రాష్ట్రంలో డీఎస్సీ 2025 ద్వారా 16,347 ఉపాధ్యాయ పోస్టుల భర్తీకి నోటిఫికేషన్ ఇటీవల విడుదలైన సంగతి తెలిసిందే. ఆన్‌లైన్ దరఖాస్తుల ప్రక్రియ ప్రస్తుతం కొనసాగుతుండగా, దరఖాస్తుల స్వీకరణకు మే 15 చివరి తేది అని విద్యాశాఖ అధికారులు స్పష్టం చేశారు. అభ్యర్థులు వెంటనే అప్లై చేసుకోవాలని సూచించారు.
ఈ మెగా రిక్రూట్‌మెంట్‌లో SGT (6,599), స్కూల్ అసిస్టెంట్ (7,487), PET లాంటి పోస్టులు ఉన్నాయి. జిల్లాల వారీగా 14,088 పోస్టులు ఉండగా, రాష్ట్ర/జోన్ స్థాయిలో 2,259 ఖాళీలు ఉన్నాయి. గిరిజన ఆశ్రమ, జువెనైల్ సంక్షేమ పాఠశాలల్లోనూ పోస్టులు ఉన్నాయి. గత ఏడేళ్లుగా డీఎస్సీ కోసం ఎదురు చూస్తున్న అభ్యర్థులకు ఇది మంచి అవకాశం.
2018 తర్వాత ఏపీలో ఇదే తొలి డీఎస్సీ నోటిఫికేషన్ కావడం విశేషం. టెట్ 2023 అక్టోబరులో నిర్వహించి, డీఎస్సీ సిలబస్‌ను నవంబరులో విడుదల చేశారు. ఎస్సీ ఉపవర్గీకరణ నేపథ్యంలో డీఎస్సీ ప్రకటన ఆలస్యం అయినప్పటికీ, ఇప్పుడు స్పోర్ట్స్ కోటాను 3%కి పెంచి మరింత ఎక్కువ పోస్టులతో నోటిఫికేషన్ ఇచ్చారు. జూన్ 6 నుంచి CBT పరీక్షలు నిర్వహించనున్నట్లు ప్రభుత్వం ప్రకటించింది.
ఈ నియామకాల వల్ల ప్రభుత్వ, జిల్లా పరిషత్తు, పురపాలక పాఠశాలలు, గిరిజన పాఠశాలల్లో ఉపాధ్యాయ ఖాళీలు పూరించబడతాయని ప్రభుత్వం భావిస్తోంది. నిరుద్యోగులకు ఇది ఒక నిరీక్షణ ముగింపు లాంటి అవకాశంగా మారింది.
By
