ఆంధ్రప్రదేశ్ రాష్ట్రంలో వాతావరణ పరిస్థితులు అత్యంత విభిన్నంగా మారుతున్నాయి. ఒకవైపు ఎండలు ఉక్కిరిబిక్కిరి చేస్తుండగా, మరోవైపు ఈదురుగాలులతో కూడిన వర్షాలు ప్రజలను ఆందోళనకు గురి చేస్తున్నాయి. సోమవారం నంద్యాల జిల్లాలోని పసుపులలో గరిష్ఠంగా 42.5 డిగ్రీల ఉష్ణోగ్రత నమోదు కాగా, జమ్మలమడుగు (42.4°), రావిపాడు (42.1°), కలుగోట్ల (41.8°)లోనూ అధిక ఉష్ణోగ్రతలు నమోదయ్యాయి.
వాతావరణశాఖ తాజా హెచ్చరికల ప్రకారం, మంగళవారం కూడా రాష్ట్ర వ్యాప్తంగా 41°C నుంచి 43°C మధ్య ఉష్ణోగ్రతలు నమోదయ్యే అవకాశం ఉంది. దీంతోపాటు, ఈదురుగాలులతో కూడిన ఉరుములు, మెరుపులతో కూడిన వర్షాలు కూడా పడే అవకాశం ఉందని అధికారులు చెబుతున్నారు.
ఈ జిల్లాల్లో అధిక అప్రమత్తత అవసరం:
శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, అనకాపల్లి, పల్నాడు, ప్రకాశం జిల్లాల్లో బలమైన ఈదురుగాలులతో కూడిన వర్షాలు కురిసే అవకాశముందని వాతావరణ శాఖ హెచ్చరించింది.
తేలికపాటి వర్షాలు పడే జిల్లాలు:
విశాఖపట్నం, కాకినాడ, కోనసీమ, తూర్పు గోదావరి, పశ్చిమ గోదావరి, కృష్ణా, గుంటూరు, బాపట్ల, నెల్లూరు, అనంతపురం, శ్రీ సత్యసాయి, తిరుపతి, చిత్తూరు జిల్లాల్లో తేలికపాటి వర్షాలు పిడుగులతో కలిసి కురిసే సూచనలు ఉన్నాయి.
ప్రజలు చెట్ల క్రింద లేదా శిథిల భవనాల వద్ద నిలవకుండా జాగ్రత్తలు పాటించాలని సూచించారు. రైతులకు హెచ్చరికలు: ఎండబట్టిన పంటలను రక్షించుకునేందుకు తగిన చర్యలు తీసుకోవాలని, వర్షం వల్ల ధాన్యం నష్టం కాకుండా చూసుకోవాలని కోరారు.
By
