ఆంధ్రప్రదేశ్‌లో ఎన్డీఏ కూటమి ప్రభుత్వం తొలిసారిగా పూర్తిస్థాయి బడ్జెట్ను ప్రవేశపెట్టింది. ఇది కూటమి ప్రభుత్వం ఏర్పడిన తర్వాత తొలి పూర్తి స్థాయి బడ్జెట్. ఉదయం 10 గంటలకు అసెంబ్లీలో ఆర్థిక మంత్రి పయ్యావుల కేశ‌వ్‌, మండలిలో మంత్రి కొల్లు రవీంద్ర బడ్జెట్ను ప్రవేశపెట్టారు.
ఈ బడ్జెట్‌లో సూపర్ 6 పథకాలు, రాజధాని అమరావతి నిర్మాణంకి ప్రత్యేక ప్రాధాన్యం ఇచ్చారు. 2025-26 ఆర్థిక సంవత్సరానికి సంబంధించి రూ.3,22,359 కోట్ల భారీ బడ్జెట్ ను రూపొందించారు. రాష్ట్ర ఆర్థిక పరిస్థితిని మెరుగుపరచడం ప్రధాన లక్ష్యమని ఆర్థిక మంత్రి పేర్కొన్నారు. అలాగే, గత ప్రభుత్వ అప్పులను ప్రస్తావిస్తూ వైసీపీపై విమర్శలు చేశారు.
అమరావతికి ప్రత్యేక కేటాయింపు
బడ్జెట్ ప్రవేశపెట్టడానికి ముందుగా ఉదయం 9 గంటలకు ముఖ్యమంత్రి చంద్రబాబు నాయుడు అధ్యక్షతన క్యాబినెట్ భేటీ నిర్వహించారు.
రాజధాని అమరావతికి రూ.6,000 కోట్లు కేటాయించడంతో దీనిపై విశేష ఆసక్తి నెలకొంది. అమరావతి రైతుల పోరాటాన్ని మంత్రి గుర్తు చేసుకుంటూ, త్వరలో రాజధాని పనులు ప్రారంభమవుతాయని తెలిపారు. అమరావతిని రాష్ట్రాభివృద్ధికి “గ్రోత్ ఇంజన్”గా అభివృద్ధి చేస్తామని చెప్పారు.
విభాగాల వారీగా బడ్జెట్ కేటాయింపులు
- వ్యవసాయ బడ్జెట్ – రూ.48,000 కోట్లు
- పాఠశాల విద్యాశాఖ – రూ.31,806 కోట్లు
- బీసీ సంక్షేమం – రూ.23,260 కోట్లు
- వైద్యారోగ్య శాఖ – రూ.19,265 కోట్లు
- పంచాయతీరాజ్‌ గ్రామీణాభివృద్ధి శాఖ – రూ.18,848 కోట్లు
- జలవనరుల శాఖ – రూ.18,020 కోట్లు
- పురపాలక శాఖ – రూ.13,862 కోట్లు
- ఇంధన శాఖ – రూ.13,600 కోట్లు
- రవాణా శాఖ – రూ.8,785 కోట్లు
- వ్యవసాయశాఖ – రూ.11,632 కోట్లు
- సాంఘిక సంక్షేమం – రూ.10,909 కోట్లు
- ఆర్థికంగా వెనుకబడినవారి సంక్షేమం – రూ.10,619 కోట్లు
- అమరావతి నిర్మాణం – రూ.6,000 కోట్లు
- రోడ్ల నిర్మాణం, మరమ్మతులు – రూ.4,220 కోట్లు
- పోర్టులు, ఎయిర్‌పోర్టులు – రూ.605 కోట్లు
- ఆర్టీజీఎస్‌ – రూ.101 కోట్లు
- ఐటీ, ఎలక్ట్రానిక్స్‌కు రాయితీలు – రూ.300 కోట్లు
ప్రత్యేక సంక్షేమ పథకాలకు నిధులు
- NTR భరోసా పెన్షన్‌ – రూ.27,518 కోట్లు
- ఆదరణ పథకం – రూ.1,000 కోట్లు
- మనబడి పథకం – రూ.3,486 కోట్లు
- తల్లికి వందనం పథకం – రూ.9,407 కోట్లు
- దీపం 2.0 పథకం – రూ.2,601 కోట్లు
- బాల సంజీవని పథకం – రూ.1,163 కోట్లు
- చేనేత, నాయీబ్రాహ్మణుల ఉచిత విద్యుత్‌ – రూ.450 కోట్లు
- ఎస్సీ, ఎస్టీ, బీసీ స్కాలర్‌షిప్‌లు – రూ.3,377 కోట్లు
- స్వచ్ఛ ఆంధ్ర – రూ.820 కోట్లు
- ఎస్సీ, ఎస్టీల ఉచిత విద్యుత్‌ – రూ.400 కోట్లు
కృషి, సాగునీటి ప్రాజెక్టులకు నిధులు
- అన్నదాత సుఖీభవ పథకం – రూ.6,300 కోట్లు
- ధరల స్థిరీకరణ నిధి – రూ.300 కోట్లు
- సాగునీటి ప్రాజెక్టులు – రూ.11,314 కోట్లు
- పోలవరం ప్రాజెక్టు – రూ.6,705 కోట్లు
- జల్‌జీవన్‌ మిషన్‌ – రూ.2,800 కోట్లు
- రాష్ట్రీయ కృషి వికాస్‌ యోజన – రూ.500 కోట్లు
మొత్తంగా
ఈ బడ్జెట్ ద్వారా రాష్ట్ర అభివృద్ధికి కావాల్సిన నిధులు సమర్థంగా కేటాయించామని ప్రభుత్వం చెబుతోంది. ముఖ్యంగా అమరావతికి భారీ నిధులు కేటాయించడం, సూపర్ 6 పథకాలకు ప్రత్యేక ప్రాధాన్యత ఇవ్వడం ఈ బడ్జెట్‌లో ప్రధాన ఆకర్షణగా నిలిచాయి.
By
