ములుగు జిల్లాలోని కర్రెగుట్ట అటవీ ప్రాంతంలో మావోయిస్టుల ఉనికి సమాచారం అందడంతో భద్రతా బలగాలు “ఆపరేషన్ కగార్” చేపట్టాయి. ఇప్పటికే కొన్ని ఎన్‌కౌంటర్లలో మావోయిస్టులు మృతి చెందగా, బుధవారం మరింత తీవ్రంగా పరిస్థితులు మారాయి. మావోయిస్టులను పట్టుకునే లక్ష్యంతో గ్రేహౌండ్స్ బలగాలు, ములుగు పోలీసులు కూంబింగ్ నిర్వహించారు. అయితే వారి ఉద్యమాన్ని గమనించిన మావోయిస్టులు మందుపాతరలు పేల్చి అనంతరం కాల్పులకు తెగబడ్డారు. ఈ కాల్పుల్లో ముగ్గురు గ్రేహౌండ్స్ కానిస్టేబుళ్లు వడ్ల శ్రీధర్, సందీప్, పవన్ కల్యాణ్‌ అక్కడికక్కడే ప్రాణాలు కోల్పోయారు. మరో ఆర్‌ఎస్‌ఐ అధికారి రణధీర్‌ తీవ్రంగా గాయపడ్డారు.
ఈ ఘటనపై తీవ్ర దిగ్భ్రాంతికి లోనైన రాష్ట్ర ప్రభుత్వం, అమరులైన కానిస్టేబుళ్ల మృతదేహాలను హెలికాప్టర్‌ ద్వారా వరంగల్‌ ఎంజీఎం ఆసుపత్రికి తరలించి, పోస్టుమార్టం అనంతరం పోలీసు హెడ్‌క్వార్టర్స్‌కు తీసుకువచ్చారు. మంత్రి సీతక్క, డీజీపీ జితేందర్, వరంగల్‌ సీపీ సన్‌ప్రీత్ సింగ్, ములుగు ఎస్పీ శబరీష్, ఎమ్మెల్యే రాజేందర్‌రెడ్డి తదితరులు నివాళులర్పించారు. అనంతరం మృతదేహాలను వారి కుటుంబాలకు అప్పగించారు.
అమరులైన కానిస్టేబుళ్ల వివరాల్లో, సందీప్ మేడ్చల్‌ జిల్లా ఘట్‌కేసర్‌ వాసి కాగా, 2018లో గ్రేహౌండ్స్‌కు చేరారు. వడ్ల శ్రీధర్ కామారెడ్డి జిల్లా పల్వంచకు చెందినవారు. పవన్ కల్యాణ్‌ ఆంధ్రప్రదేశ్‌ ప్రకాశం జిల్లాకు చెందినవారు. వీరందరికి ఇటీవలే వివాహమై ఉండటం, కుటుంబాలపై వీరి మరణం కలిగించిన విషాదం మరింత తీవ్రమైంది.
By
