అమరావతి, మే 5: ఆంధ్రప్రదేశ్ రాష్ట్ర విద్యార్థుల కోసం 2025-26 విద్యా సంవత్సరానికి సంబంధించి ప్రవేశ పరీక్షల శ్రేణి మే 6వ తేదీ నుంచి ప్రారంభమవుతోంది. ఈ మేరకు రాష్ట్ర ఉన్నత విద్యా మండలి తాజాగా షెడ్యూల్ విడుదల చేసింది. మొత్తం 8 ముఖ్యమైన ప్రవేశ పరీక్షలు మే 6 నుండి జూన్ 13 వరకు జరిగేలా ప్లాన్ చేయబడింది.
మంగళవారం ప్రారంభమయ్యే AP ECET 2025 పరీక్షల ఏర్పాట్లు పూర్తయ్యాయి. దీని తర్వాత మే 7న AP ICET 2025 నిర్వహించనున్నారు. ఈ పరీక్షల ద్వారా వివిధ ప్రొఫెషనల్ కోర్సుల్లో అడ్మిషన్లు లభించనున్నాయి. ముఖ్యంగా ECET ద్వారా డిప్లొమా పూర్తి చేసిన విద్యార్థులకు లేటరల్ ఎంట్రీ కింద నేరుగా ఇంజినీరింగ్ రెండవ సంవత్సరంలో ప్రవేశాలు లభిస్తాయి.
ECET పరీక్ష రెండు షిఫ్టుల్లో జరుగుతుంది:
- ఉదయం: 9:00 AM – 12:00 PM
- మధ్యాహ్నం: 2:00 PM – 5:00 PM
ఉన్నత విద్యా మండలి ప్రకారం, ఒక్క నిమిషం ఆలస్యం అయినా పరీక్ష కేంద్రంలోకి ప్రవేశం ఉండదు. హాల్‌టికెట్, గుర్తింపు కార్డు, బ్లూ లేదా బ్లాక్ బాల్‌పాయింట్ పెన్ను తప్పనిసరిగా తీసుకెళ్లాలి. ఎలక్ట్రానిక్ గ్యాడ్జెట్లు పూర్తి నిషేధం. హాల్‌టికెట్‌పై తప్పులుంటే పరీక్షా కేంద్రంలో అబ్జర్వర్‌ దృష్టికి తీసుకెళ్లాలని సూచించారు.
విద్యార్థులు తమ పరీక్ష కేంద్రాలకు కనీసం అరగంట ముందు చేరుకోవాలి. ఈ పరీక్షల్లో ఉత్తీర్ణత సాధించడం ద్వారా విద్యార్థులకు భవిష్యత్తులో ఉన్నత విద్యావకాశాలు లభిస్తాయి.
By
