తెలుగు రాష్ట్రాల్లో ప్రకృతి విపత్తుల వల్ల రైతులు తీవ్రంగా నష్టపోయారు. అకాల వర్షాలు, ఈదురుగాలులు, పిడుగుపాట్లు అన్నదాతలపై తీరని భారం మోపాయి. ఆరుగాలం శ్రమించి పండించిన పంట ఒక్క వర్షంతోనే నాశనమైంది. మామిడి, వరి, మిర్చి, మొక్కజొన్న వంటి పంటలు నీటిపాలవగా, రైతుల కళ్లల్లో కన్నీటి చెమరులు కనిపించాయి. అప్పులు చేసి సాగు చేసిన పంట చేతికి వచ్చేటప్పుడే నేలరాలడం బాధాకరం.
నాగర్‌కర్నూల్ జిల్లా అచ్చంపేట మండలం లింగోటంలో మామిడి రైతులు తీవ్రంగా నష్టపోయారు. పంట దాదాపుగా తుది దశలో ఉండగా, ఆకస్మిక వర్షాల కారణంగా కాయలన్నీ నేలరాలిపోయాయి. మరోవైపు వరి కోత పూర్తయిన వెంటనే వాన పడడంతో తడి ధాన్యం ఆరబోయే అవకాశం లేకుండా పోయింది. రైతులు కనీస పెట్టుబడి కూడా తిరిగి రాకుండా తీవ్ర ఆర్థిక సంక్షోభంలో చిక్కుకున్నారు.
ఇక వరంగల్, ములుగు, మహబూబాబాద్, జనగామ, జయశంకర్ భూపాలపల్లి, హనుమకొండ జిల్లాల్లో పెద్ద ఎత్తున పంట నష్టం జరిగింది. వానల ధాటికి సుమారు 21 వేల ఎకరాల్లో పంటలు నాశనమయ్యాయని అధికారులు ప్రాథమికంగా అంచనా వేస్తున్నారు. రైతులు వర్షంలో తడిసిన ధాన్యాన్ని ప్రభుత్వమే తక్షణం కొనుగోలు చేయాలని కోరుతున్నారు. రాష్ట్ర ప్రభుత్వం తక్షణమే క్షేత్రస్థాయిలో పరిశీలించి నష్టపోయిన రైతులకు న్యాయం చేయాలని విజ్ఞప్తి చేస్తున్నారు.
వికారాబాద్ జిల్లా పరిగి మండలంలో ఈదురు గాలులతో కూడిన వర్షం బీభత్సం సృష్టించింది. పలు ఇళ్ల పైకప్పులు ఎగిరిపోవడంతో పాటు భారీ వృక్షాలు, విద్యుత్ స్తంభాలు నేలకొరిగాయి. ప్రజలు భయంతో ఇళ్లలోకి పరిమితమయ్యారు.
కర్నూలు జిల్లాలో పిడుగుపాట్లు మూడు ప్రాణాలను బలి తీసుకున్నాయి. ఎమ్మిగనూరు నియోజకవర్గంలో ఇద్దరు, ఆలూరు నియోజకవర్గంలో ఒకరు మృతిచెందారు. వేర్వేరు చోట్ల జరిగిన ఈ సంఘటనలు తీవ్ర విషాదాన్ని మిగిల్చాయి. వాతావరణ విపత్తుల కారణంగా రైతుల జీవనోపాధి దెబ్బతింటున్న వేళ ప్రభుత్వం తమను ఆదుకోవాలని రైతులు కోరుతున్నారు.
By
