ఐపీఎల్ 2025 సీజన్ ఉత్కంఠభరితంగా కొనసాగుతోంది. ఇప్పటికే లీగ్ దశలో సగం మ్యాచ్‌లు పూర్తయ్యాయి. ఇప్పటివరకు జరిగిన 34 మ్యాచ్‌ల అనంతరం ఢిల్లీ జట్టు అగ్రస్థానంలో కొనసాగుతోంది. పంజాబ్ కింగ్స్‌కి 10 పాయింట్లు ఉండగా, వారు రెండో స్థానంలో ఉన్నారు.
అయితే ఈ ఉత్సాహభరిత పరిస్థితుల మధ్య ఓ సంచలన వార్త ఐపీఎల్ అభిమానుల్ని, బీసీసీఐను షాక్‌కు గురిచేసింది. హైదరాబాద్‌కు చెందిన ఓ వ్యాపారవేత్త క్రికెటర్లను ఫిక్సింగ్‌కు లోను చేయాలని ప్రయత్నిస్తున్నాడన్న వార్తలు బయటపడ్డాయి. ఖరీదైన బహుమతులు, జ్యూయలరీలు ఆఫర్ చేస్తూ, ఆటగాళ్ల బస చేసే హోటళ్ల వరకు వెళ్లి లాబీయింగ్ చేస్తున్నాడని కథనాలు వచ్చాయి.
ఈ విషయంపై రాచకొండ పోలీస్ కమిషనర్ సుధీర్ బాబు స్పందిస్తూ, ఈ వార్తల్లో ఎటువంటి నిజం లేదని ఖండించారు. “బీసీసీఐ నుంచి ఎలాంటి అధికారిక సమాచారం మాకు రాలేదు. క్రిక్‌బజ్‌ ప్రచురించిన కథనం పూర్తిగా అవాస్తవం. ఉప్పల్ స్టేడియంకి గానీ, ఆటగాళ్లు ఉండే హోటళ్లకు గానీ ఎవరూ వెళ్లలేదని మాకు నిర్ధారణ జరిగింది” అని ఆయన వివరించారు.
ఇంకా ఆయన చెప్పారు: “హైదరాబాద్ కేంద్రంగా ఎవరూ ఫిక్సింగ్‌కు ప్రయత్నించలేదని, అభిమానులు నిర్భయంగా మ్యాచ్‌లు ఆస్వాదించొచ్చని” అన్నారు.
ఈ విధంగా ఐపీఎల్ 2025 సీజన్‌కు సంబంధించి వచ్చిన ఫిక్సింగ్ ఆరోపణలు నిరాధారమైనవే అని పోలీస్ అధికారులు స్పష్టం చేశారు.
By
