ఆంధ్రప్రదేశ్ ఉపముఖ్యమంత్రి పవన్ కల్యాణ్ తన కుమారుడు మార్క్ శంకర్ చదువుతున్న సమ్మర్ క్యాంప్ స్కూల్‌లో జరిగిన అగ్నిప్రమాదంపై తీవ్ర విచారం వ్యక్తం చేశారు. ఈ ఘటన అకీరా పుట్టినరోజున జరగడం దురదృష్టకరమని ఆయన తెలిపారు. మార్క్ శంకర్‌కు చేతులు, కాళ్లకు గాయాలయ్యాయని, పొగ పీల్చడంతో ఊపిరితిత్తుల్లోకి పొగ చొరబడిందని పేర్కొన్నారు.
ఈ సంఘటనపై వివరాలు వెల్లడించిన పవన్, తాను సింగపూర్‌కు తక్షణమే బయలుదేరనున్నట్లు తెలిపారు. మంగళవారం సాయంత్రం జూబ్లీహిల్స్‌ నివాసంలో మీడియాతో మాట్లాడారు. సమ్మర్ క్యాంప్‌లో దుర్ఘటన జరిగిందని, అదే సమయంలో అనేక మంది పిల్లలు అక్కడే ఉన్నారని తెలిపారు. ఈ ప్రమాదంలో ఓ చిన్నారి ప్రాణాలు కోల్పోయిందని, మరో 15 మంది పిల్లలు, నలుగురు సిబ్బంది గాయపడ్డారని పేర్కొన్నారు.
ప్రమాదం జరిగిన చోట—సింగపూర్‌లోని రివర్ వ్యాలీ రోడ్ ఎడ్యుకేషన్ సెంటర్‌లో—ఉదయం 9:45 సమయంలో మంటలు చెలరేగాయి. మంటల అదుపులోకి రాగానే సహాయక చర్యలు చేపట్టారు. మొదట చిన్నపాటి ఘటనగా భావించినప్పటికీ, తీవ్రత అంచనా వేయలేనిదిగా మారిందని పవన్ కల్యాణ్ తెలిపారు.
ఈ ఘటనపై ప్రధాని నరేంద్ర మోదీ ఫోన్ చేసి ఆరోగ్యం తెలుసుకున్నారని, సింగపూర్ హైకమిషనర్ కూడా సమాచారం అందించారని వెల్లడించారు. ఏపీ సీఎం చంద్రబాబు, తెలంగాణ సీఎం రేవంత్ రెడ్డి సహా పలువురు నేతలు స్పందించారని, అందరికీ కృతజ్ఞతలు తెలిపారు. అరకు పర్యటనలో ఉన్న సమయంలో ఈ వార్త తెలుసుకున్నానని పవన్ వెల్లడించారు.
By
