రిజిస్ట్రేషన్ ఇక వేగంగా, పారదర్శకంగా!
తెలంగాణ రాష్ట్ర ప్రభుత్వం ప్రజలకు వేగవంతమైన, సులభమైన, అవినీతిరహిత సేవలు అందించేందుకు సబ్ రిజిస్ట్రార్ కార్యాలయాల్లో ఆధునీకరణ చేపట్టింది. ఇకపై రిజిస్ట్రేషన్ కోసం గంటల తరబడి క్యూలలో నిలబడి వేచి చూడాల్సిన అవసరం ఉండదు. గంటల స్థానంలో కేవలం 10-15 నిమిషాల్లో రిజిస్ట్రేషన్ పూర్తయ్యే విధంగా స్లాట్ బుకింగ్ విధానంను రాష్ట్ర ప్రభుత్వం ప్రవేశపెట్టింది.
ప్రయోగాత్మకంగా మొదలవుతున్న స్లాట్ బుకింగ్ విధానం:
ఏప్రిల్ 10వ తేదీ నుంచి మొదటిగా 22 సబ్ రిజిస్ట్రార్ కార్యాలయాల్లో ఈ విధానం అమల్లోకి రానుంది. ఇందులో భాగంగా:
- హైదరాబాద్: ఆజంపుర, చిక్కడపల్లి
- సంగారెడ్డి జిల్లా: సదాశివపేట
- మేడ్చల్ జిల్లా: కుత్బుల్లాపూర్, వల్లభ్ నగర్
- రంగారెడ్డి జిల్లా: శంషాబాద్, సరూర్ నగర్, చంపాపేట్
- ఇతర జిల్లాల్లో: రామగుండం, కూసుమంచి, ఖమ్మం, మేడ్చల్ (R.O), మహబూబ్ నగర్ (R.O), జగిత్యాల, నిర్మల్, వరంగల్ ఫోర్ట్, కొత్తగూడెం, ఆర్మూర్, చౌటుప్పల్, నాగర్ కర్నూల్ తదితర కేంద్రాల్లో అమలులోకి వస్తుంది.
వెబ్‌సైట్ ద్వారా సులభ స్లాట్ బుకింగ్:
ప్రజలు registration.telangana.gov.in ద్వారా తాము కోరిన తేదీ, సమయానికి స్లాట్ బుక్ చేసుకుని వేచి లేకుండానే రిజిస్ట్రేషన్ పూర్తి చేసుకోవచ్చు. ప్రతి కార్యాలయంలో రోజు 48 స్లాట్లుగా విభజన ఉంటుంది. అవసరమైతే అదనపు సిబ్బందిని నియమించి స్లాట్లు పెంచే అవకాశం ఉంది.
వాక్-ఇన్ అవకాశం కూడా ఉంటుంది:
ఆన్‌లైన్‌లో స్లాట్ బుక్ చేయని వారు అత్యవసర సందర్భాల్లో రోజూ సాయంత్రం 5 నుంచి 6 గంటల మధ్యలో వాక్-ఇన్ ద్వారా రిజిస్ట్రేషన్ చేయించుకోవచ్చు. ఫస్ట్ కం ఫస్ట్ సర్వ్ ప్రాతిపదికన ఇల్లు దస్తావేజులు స్వీకరిస్తారు.
ఇ-సంతకాలు, చట్ట సవరణలు:
- రిజిస్ట్రేషన్ ప్రక్రియ వేగవంతం చేయడంలో భాగంగా ఆధార్ ఆధారిత ఇ-సిగ్నేచర్ వ్యవస్థను కూడా ఈ నెలాఖరున ప్రారంభించనున్నారు.
- “డబుల్ రిజిస్ట్రేషన్” సమస్య నివారణకు రిజిస్ట్రేషన్ చట్టం 22వ సెక్షన్‌కి సవరణ చేస్తూ 22-బి సెక్షన్ ప్రవేశపెడుతున్నారు.
దస్తావేజుల తయారీకి వెబ్ మాడ్యూల్:
ప్రజలు ఇతరులపై ఆధారపడకుండా స్వయంగా సేల్ డీడ్ వంటి డాక్యుమెంట్లను సిద్ధం చేసుకోవడానికి వెబ్‌సైట్‌లో ప్రత్యేక మాడ్యూల్ అందుబాటులో ఉంటుంది.
ప్రాంతాల ఆధారంగా పునఃనిర్వచనం:
చాలా పని ఉండే కార్యాలయాల్లో పని భారం తగ్గించేందుకు చంపాపేట-సరూర్ నగర్ కార్యాలయాల హద్దులు విలీనం చేసి పని సమానంగా పంపిణీ చేస్తున్నారు.
By
