కంచ గచ్చిబౌలిలో చెట్ల నరికివేతపై కేంద్ర మంత్రి ఆగ్రహం: సీఎం రేవంత్‌ స్పందించాలని డిమాండ్…!!

కంచ గచ్చిబౌలిలోని భూములపై ప్రభుత్వ చర్యలపై సుప్రీంకోర్టు తీవ్ర ఆగ్రహం వ్యక్తం చేసింది. హైకోర్టు రిజిస్ట్రార్ స్థలాన్ని పరిశీలించి ఇచ్చిన నివేదిక ఆధారంగా, తెలంగాణ ప్రభుత్వాన్ని ప్రశ్నిస్తూ, తదుపరి ఉత్తర్వులు వచ్చేవరకు అన్ని చర్యలు నిలిపివేయాలని ఆదేశించింది. పర్యావరణ అనుమతులు తీసుకున్నారా? చెట్ల తొలగింపునకు అత్యవసరత ఏంటి? వంటి ప్రశ్నలతో సీఎస్‌కు అఫిడవిట్ దాఖలు చేయాలని స్పష్టంగా చెప్పింది. చెట్ల తొలగింపు ఉల్లంఘన అయితే పూర్తి బాధ్యత సీఎస్‌దేనని హెచ్చరించింది.

కేంద్ర మంత్రి కిషన్ రెడ్డి స్పందిస్తూ – సుప్రీం కోర్టు జోక్యంతో 400 ఎకరాల పచ్చదనాన్ని రక్షించడం గొప్ప విజయం అన్నారు. స్టార్ తాబేలు వంటి అరుదైన జీవులు ఉండే ఈ ప్రాంతంలో నష్టం కలిగించడాన్ని ఆయన ఖండించారు. కోర్టు ఇచ్చిన మధ్యంతర ఉత్తర్వుల తర్వాత కూడా చెట్ల నరికివేత కొనసాగుతుండటం దురదృష్టకరమన్నారు.

కోర్టు 4 ముఖ్యమైన ప్రశ్నలకు సమాధానం కోరింది –

1. చెట్ల తొలగింపుకు ఉన్న అత్యవసరత ఏమిటి?
2. పర్యావరణ అంచనా అనుమతులు తీసుకున్నారా?
3. అటవీ అధికారుల అనుమతి ఉందా?
4. నరికిన చెట్లపై ప్రభుత్వ చర్యలేమిటి?

రాష్ట్రం అఫిడవిట్‌లో పూర్తి సమాధానాలు ఇవ్వాలని, అప్పటివరకు ఏ పనులూ చేపట్టకూడదని స్పష్టం చేసింది. ఉల్లంఘన అయితే సీఎస్‌పై చర్యలు తప్పవని హెచ్చరించింది. ముఖ్యమంత్రి రేవంత్ రెడ్డి సుప్రీం ఆదేశాలను పాటించాలని కోరుతూ, అక్రమంగా అరెస్టు అయిన వారిని విడుదల చేయాలని కిషన్ రెడ్డి డిమాండ్ చేశారు.

ఇక, హైకోర్టు కూడా చెట్ల తొలగింపు పై స్టే ఇవ్వగా, విచారణను ఏప్రిల్ 7కు వాయిదా వేసింది. అయినప్పటికీ చర్యలు కొనసాగుతున్నాయంటూ పిటిషనర్ ఆధారాలు సమర్పించగా, హైకోర్టు కౌంటర్ దాఖలు చేయాలని రాష్ట్ర ప్రభుత్వానికి నోటీసులు జారీ చేసింది. ఏప్రిల్ 7న కోర్టు ఎలాంటి నిర్ణయం తీసుకుంటుందన్నదే ఇప్పుడు కీలకం.