మనకు ఎన్నో రకాల డ్రై ఫ్రూట్స్ అందుబాటులో ఉన్నా, బాదంపప్పుకు ప్రత్యేకమైన స్థానం ఉంది. ఇందులో ఫైబర్‌తో పాటు ఆరోగ్యకరమైన కొవ్వులు, ఇతర అనేక పోషకాలు పుష్కలంగా ఉంటాయి. బాదం విటమిన్ E కి మంచి మూలం, ఇది కణాలను రక్షించడంలో సహాయపడుతుంది. అంతేకాక, కాల్షియం, ఐరన్, జింక్, మెగ్నీషియం వంటి ముఖ్యమైన ఖనిజాలు కూడా ఇందులో లభిస్తాయి. ఇవన్నీ శరీరం చక్కగా పనిచేయడానికి అవసరమైనవి.
అధ్యయనాల ప్రకారం, బాదంపప్పులో విటమిన్లు, ఖనిజాలు, ప్రోటీన్లు, ఫైబర్ మొదలైనవి అధికంగా ఉంటాయి. కొన్ని బాదంపప్పులు రోజువారీ ప్రోటీన్ అవసరాలలో ఎనిమిదో వంతుగా అందిస్తాయి. చాలామంది బాదంపప్పును పచ్చిగా లేదా నానబెట్టి తింటారు. కానీ, బాదంపప్పును తేనెతో కలిపి తినడం వల్ల మరింత ప్రయోజనం ఉందని మీకు తెలుసా?
బాదం లాగే, తేనె కూడా ఆరోగ్యానికి అమృతం లాంటిది. తేనెను ఆయుర్వేదంలో వైద్యపరమైన ప్రయోజనాల కోసం వాడతారు. తేనె శరీరానికి అనేక రకాల ప్రయోజనాలను అందిస్తుంది. ఇందులో యాంటీఆక్సిడెంట్లు పుష్కలంగా ఉండి, శరీరాన్ని ఫ్రీ రాడికల్స్ నుండి రక్షిస్తాయి. తేనె బ్యాక్టీరియా, ఫంగస్‌లను చంపగలదని పరిశోధనల్లో తేలింది. సహజంగా లభించే హైడ్రోజన్ పెరాక్సైడ్ వల్ల ఇది యాంటీ బాక్టీరియల్, యాంటీ ఫంగల్ గుణాలను కలిగి ఉంటుంది.
తేనె జీర్ణక్రియను మెరుగుపరిచే శక్తిని కలిగి ఉంది. ఇది ఫ్లూ లక్షణాలను తగ్గించడంతో పాటు బరువును నియంత్రించడంలో సహాయపడుతుంది. బాదం, తేనె మిశ్రమాన్ని ఉదయం ఖాళీ కడుపుతో తీసుకోవడం వల్ల గుండె ఆరోగ్యాన్ని మెరుగుపరచుకోవచ్చు. ఇవి కొలెస్ట్రాల్ స్థాయిని తగ్గించడంలో సహాయపడతాయి. అధ్యయనాల ప్రకారం, బాదం, తేనె గుండె సంబంధిత సమస్యల ప్రమాదాన్ని తగ్గించగలవు.
చక్కెర అధికంగా తీసుకోవడం వల్ల డయాబెటిస్ సమస్య వచ్చే అవకాశముంది. అయితే, తేనె చక్కెరకు ఆరోగ్యకరమైన ప్రత్యామ్నాయంగా ఉపయోగించుకోవచ్చు. తేనె తీసుకోవడం వల్ల రక్తంలో చక్కెర స్థాయులు అదుపులో ఉంటాయి. బాదం, తేనె కలిపి తీసుకుంటే శరీర శక్తి పెరుగుతుంది.
బాదం జింక్, విటమిన్ B, ఐరన్ వంటి పోషకాలకు నిలయం. తేనె రోగనిరోధక శక్తిని పెంచే లక్షణాలను కలిగి ఉంది. ఈ మిశ్రమాన్ని తీసుకోవడం ద్వారా ఆరోగ్య ప్రయోజనాలు పొందవచ్చు. ఫ్లూ కాలంలో ఇది శరీర రక్షణ శక్తిని మెరుగుపరిచే పనిని చేస్తుంది.
చర్మ ఆరోగ్యాన్ని మెరుగుపరిచే అద్భుతమైన లక్షణాలు కూడా ఈ మిశ్రమానికి ఉన్నాయి. బాదంపప్పు పొడిని తేనెతో కలిపి ఫేస్ ప్యాక్‌గా ఉపయోగిస్తే చర్మం తేజోవంతంగా మారుతుంది. ఇది చర్మ రంధ్రాలను శుభ్రపరచి, మొటిమలు, మచ్చలు, ముడతలను తగ్గించడంలో సహాయపడుతుంది. మెరుగైన ఫలితాల కోసం ఈ మిశ్రమంలో కొద్దిగా పాలు కూడా కలిపి ఉపయోగించవచ్చు.
ముఖ్యమైన గమనిక:
ఈ సమాచారం కేవలం అవగాహన కోసం మాత్రమే. ఆరోగ్య సంబంధిత ఏదైనా సమస్య ఉంటే, నిపుణుల సలహా తప్పనిసరిగా తీసుకోవాలి.
By
