తెలంగాణలో సీఎం రేవంత్ రెడ్డి ప్రభుత్వం ఏర్పడి 14 నెలలు పూర్తి కావస్తోంది. ఇప్పటికీ 11 మంది మంత్రులతోనే పాలన కొనసాగిస్తున్నారు. అయితే, త్వరలోనే కేబినెట్ విస్తరణ జరగనుందని తెలుస్తోంది. సీఎం రేవంత్ ఢిల్లీలో ఉన్న వేళ, కాంగ్రెస్ హైకమాండ్ కేబినెట్ విస్తరణకు గ్రీన్ సిగ్నల్ ఇచ్చిందా? రేవంత్ కేబినెట్ 2.0లో ఎవరికి చోటు దక్కనుందో హాట్ టాపిక్‌గా మారింది.
ఇప్పటివరకు వాయిదా పడుతూ వస్తున్న తెలంగాణ కేబినెట్ విస్తరణ ఇప్పుడు ఖరారైనట్లుగా సమాచారం. ఈ అంశంపై ఇప్పటికే కాంగ్రెస్ హైకమాండ్ దృష్టిసారించింది. ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్క ఢిల్లీలో వరుస సమావేశాలు నిర్వహిస్తున్నారు. ప్రస్తుతం ఖాళీగా ఉన్న 6 మంత్రివర్గ పదవులకు కనీసం 10 మంది ఎమ్మెల్యేలు పోటీ పడుతున్నారు. ముఖ్యంగా ఉమ్మడి నిజామాబాద్, ఆదిలాబాద్, రంగారెడ్డి, హైదరాబాద్ జిల్లాలకు ప్రాతినిధ్యం లేకపోవడంతో, కేబినెట్ విస్తరణ మరింత ప్రాధాన్యత సంతరించుకుంది.
మంత్రివర్గ విస్తరణలో ముఖ్యమైన అంశాలు
- ముదిరాజ్ సామాజిక వర్గానికి ఒక బెర్త్ ఖాయం అని ఇప్పటికే సీఎం హామీ ఇచ్చారు.
- మైనారిటీలకు ప్రాధాన్యత ఇవ్వాలని, యువతకు అధిక అవకాశాలు కల్పించాలని ప్రభుత్వం యోచిస్తోంది.
- కొన్ని శాఖల మార్పు కూడా ఉండే అవకాశం ఉంది.
మంత్రి పదవుల రేసులో ఉన్న పేర్లు
కేబినెట్‌లో స్థానం కోసం ఉమ్మడి ఆదిలాబాద్ నుంచి ప్రేమ్ సాగర్ రావు, గడ్డం వివేక్, గడ్డం వినోద్, నిజామాబాద్ నుంచి సుదర్శన్ రెడ్డి, మహబూబ్ నగర్ నుంచి వాకిటి శ్రీహరి పేర్లు పరిశీలనలో ఉన్నాయి.
- ఉమ్మడి నల్గొండ జిల్లా నుంచి కోమటిరెడ్డి రాజగోపాల్ రెడ్డి
- హైదరాబాద్ నుంచి దానం నాగేందర్
- బీసీల నుంచి వేములవాడ ఎమ్మెల్యే ఆది శ్రీనివాస్
- రంగారెడ్డి జిల్లా ఎమ్మెల్యేలలో కూడా మంత్రివర్గంలో స్థానం కోసం ఆసక్తి ఉంది.
ప్రస్తుతం ఖాళీగా ఉన్న 6 మంత్రి పదవుల్లో 4 బెర్త్‌లను భర్తీ చేయనున్నట్లు సమాచారం. అలాగే, ఇప్పటికే కేబినెట్‌లో ఉన్న కొన్ని మంత్రుల స్థానాల్లో మార్పు చేయనున్నారని తెలుస్తోంది.
కాంగ్రెస్ నేతలతో కేసీ వేణుగోపాల్ సమావేశాలు
ఢిల్లీలో తెలంగాణ కాంగ్రెస్ ముఖ్య నేతలతో కేసీ వేణుగోపాల్ సమావేశాలు జరిపారు. ముఖ్యంగా పీసీసీ కార్యవర్గ కూర్పుపై చర్చ జరిగింది.
- నలుగురు కార్యనిర్వాహక అధ్యక్షులను నియమించనున్నట్లు సమాచారం.
- మాదిగ, ముస్లిం, లంబాడా, రెడ్డి వర్గాలకు ప్రాధాన్యత.
- పీసీసీ కార్యవర్గంలో 15-20 మంది ఉపాధ్యక్షులు ఉండే అవకాశం ఉంది.
- మంత్రివర్గ మార్పులపై స్పష్టత లేదని తెలుస్తోంది.
సీఎం రేవంత్ రెడ్డి కీలక వ్యాఖ్యలు
సీఎం రేవంత్ రెడ్డి మాట్లాడుతూ, “మంత్రివర్గ మార్పులు పూర్తిగా అధిష్టానం నిర్ణయమే. నేను ఎవరి పేర్లు ప్రతిపాదించలేదు.” అని స్పష్టం చేశారు. కేసుల విషయంలో చట్ట ప్రకారం ముందుకు వెళ్తామని పేర్కొన్నారు.
మూడు రోజుల్లో అధికారిక ప్రకటన?
ఒకటి, రెండు రోజుల్లో మంత్రివర్గ విస్తరణపై అధికారికంగా ప్రకటన వచ్చే అవకాశం ఉంది. ఇప్పటికే ఢిల్లీలో కీలక నేతలతో జరుపుతున్న చర్చలు ముగింపు దశకు చేరుకున్నాయి. మరి, రేవంత్ కేబినెట్ 2.0లో ఎవరు చోటు దక్కించుకుంటారో వేచి చూడాలి!
By
