టీటీడీ తరహాలో యాదగిరిగుట్ట దేవస్థానం బోర్డు ఏర్పాటు – సీఎం రేవంత్ ఆదేశం
హైదరాబాద్, జనవరి 30: తిరుమల తిరుపతి దేవస్థానాల (టీటీడీ) తరహాలోనే యాదగిరిగుట్ట దేవస్థానం బోర్డు ఏర్పాటుకు వేగంగా చర్యలు తీసుకోవాలని ముఖ్యమంత్రి రేవంత్ రెడ్డి అధికారులను ఆదేశించారు. ఆలయ పవిత్రతను కాపాడేందుకు అవసరమైన చర్యలు తీసుకోవాలని, భవిష్యత్ అవసరాలకు అనుగుణంగా పాలన విధివిధానాలను రూపొందించాలని సూచించారు.
బుధవారం తన నివాసంలో జరిగిన సమీక్ష సమావేశంలో, ధర్మకర్తల మండలి (యాదగిరిగుట్ట టెంపుల్ ట్రస్ట్ బోర్డు) ఏర్పాటుకు రూపొందించిన ముసాయిదాపై ముఖ్యమంత్రి పలు సవరణలను ప్రతిపాదించారు. ముఖ్యంగా, ఆలయ నిర్వహణలో రాజకీయ ప్రభావం లేకుండా, పవిత్రతకు భంగం కలగకుండా అన్ని జాగ్రత్తలు తీసుకోవాలని సూచించారు.
ఆలయ పవిత్రతకు ప్రాధాన్యత
సీఎం రేవంత్ రెడ్డి, యాదగిరిగుట్ట ఆలయం ఆధ్యాత్మిక పవిత్రతను కాపాడుకోవాల్సిన అవసరాన్ని నొక్కి చెప్పారు. తిరుమల ఆలయ తరహాలో పాలన వ్యవస్థను పటిష్టంగా మార్చాలని, భక్తులకు మతపరమైన సేవలను మెరుగుపరిచే చర్యలు తీసుకోవాలని సూచించారు.
ధర్మకర్తల మండలి నియామకంపై మార్పులు
ధర్మకర్తల మండలి నియామకానికి సంబంధించి రూపొందించిన ముసాయిదాలో పలు మార్పులను సీఎం ప్రతిపాదించారు. ఈ మార్పులు ఆలయ పాలన, నిర్వహణను మెరుగుపరచడం, భక్తులకు అత్యుత్తమ సేవలను అందించడమే లక్ష్యంగా ఉన్నాయి. ఆలయ అభివృద్ధికి సంబంధించి చేపట్టాల్సిన ఆధ్యాత్మిక, సేవా కార్యక్రమాల అంశాలను కూడా సీఎం సమీక్షించారు.
సమీక్షలో పాల్గొన్న అధికారులు
ఈ సమీక్ష సమావేశంలో రాష్ట్ర ప్రభుత్వ ప్రధాన కార్యదర్శి శాంతికుమారి, దేవాదాయ శాఖ ముఖ్య కార్యదర్శి శైలజా రామయ్యర్, రాష్ట్ర ప్రభుత్వ సలహాదారు (మౌలిక వసతులు) శ్రీనివాసరాజు, ముఖ్యమంత్రి కార్యదర్శి మాణిక్ రాజ్, ముఖ్యమంత్రి ఓఎస్డీ వేముల శ్రీనివాసులు తదితరులు పాల్గొన్నారు.
By
